ખેડૂત આંદોલન ઉગ્ર બન્યું : 8 ડિસેમ્બરે ભારત બંધનું એલાન

 

કેન્દ્ર સરકાર અને પ્રદર્શન કરી રહેલા ખેડૂતો વચ્ચે નવા કૃષિ કાયદા પર સંમતિ નથી ઊભી થઈ રહી આ દરમિયાન ખેડૂતોએ કેન્દ્ર પર દબાણ વધારવા માટે આંદોલન ઉગ્ર કરવાનું નક્કી કરાયું છે. ખેડૂતોનું કહેવું છે કે, જો કેન્દ્ર સરકાર તેમની માંગ નહીં માને તો 8 ડિસેમ્બરે ભારત બંધ કરાશે. તો, ખેડૂત નેતા હરવિંદર સિંહ લખવાલે કહ્યું કે, દિલ્હીના અન્ય રસ્તાઓને પણ રોકવાની યોજના બનાવાઈ છે. તો, શનિવારે મોદી સરકાર અને કોર્પોરેટ હોઉસોના પૂતળા ફૂંકવાની પણ જાહેરાત કરાઈ છે.

દિલ્હી-ગાઝિયાબાદ બોર્ડર પર પ્રદર્શનની આગેવાની કરી રહેલા ખેડૂત નેતા રાકેશ ટિકેતે 8 ડિસેમ્બરે ભારત બંધનું આહવાહન કરતા ગણતંત્ર દિવસની પરેડમાં ખેડૂતોની ભાગીદારીની માંગ કરી. તેમણે કહ્યું કે, '8 તારીખે આખું ભારત બંધ રહેશે. આ વખતે 26મી જાન્યુઆરીની પરેડમાં ખેડૂતોની સમગ્ર સિસ્ટમને સામેલ કરવામાં આવે. ટ્રેક્ટર હંમેશા ખાડાવાળા રસ્તાઓ પર જ ચાલ્યું છે, તેને પણ રાજપથના મુલાયમ રસ્તા પર ચાલવાની તક મળવી જોઈએ.'

બીજી તરફ, સિંધુ બોર્ડર પર મોર્ચો સંભાળી રહેલા અખિલ ભારતીય કિસાન સભાના મહાસચિવ હન્નાન મોલ્લાહે સ્પષ્ટ કહ્યું કે, ભારત સરકારનું કોઈપણ સંશોધન સ્વીકાર કરવામાં નહીં આવે. તેમણે કિસાન આંદોલનને માત્ર પંજાબનું આંદોલન કહેવા સામે રોષ વ્યક્ત કર્યો. તેમણે કહ્યું કે, 'તેને માત્ર પંજાબનું આંદોલન કહેવું એ સરકારનું ષડયંત્ર છે, પરંતુ આજે ખેડૂતોએ બતાવ્યું કે, આ આંદોલન સમગ્ર ભારતમાં થઈ રહ્યું છે અને આગળ પણ થશે. અમે નિર્ણય કર્યો છે કે, જો સરકાર કોઈ સંશોધન રાખશે તો અમે સંશોધનનો સ્વીકાર નહીં કરીએ.'

આ પ્રદર્શન સ્થળ પર ભારતીય કિસાન યુનિયનએ શનિવારે પૂતળા દહનના કાર્યક્રમની જાહેરાત કરી. યુનિયનના મહાસચિવે કહ્યું કે, '5 ડિસેમ્બરે મોદી સરકાર અને કોર્પોરેટ હાઉસના પુતળાઓનું દેશમાં દહન કરાશે. 7 તારીખે બધા વીર પોતાના મેડલો પાછા આપશે. 8 તારીખે અમે ભારત બંધનું આહવાહન કર્યું છે તેમજ એક દિવસ માટે બધા ટોલ પ્લાઝા ફ્રી કરી દેવાશે.'

બીજી તરફ, ખેડૂત આંદોલન પર દરેક પક્ષ પોતાનો રાજકીય રોટલો શેકવાનો પ્રયાસ કરી રહ્યો છે. વિપક્ષોને આ આંદોલનમાં કેન્દ્ર સરકારને બેકફૂટ પર લાવવાની એક તક દેખાઈ રહી છે. એટલે, તેમનામાં ખેડૂતોનું સમર્થન મેળવવાની હોડ દેખાઈ રહી છે. એ કારણે જ તેઓ એકબીજા પર આરોપ પણ લગાવી રહ્યા છે. દિલ્હીના નાયબ મુખ્યમંત્રી અને આપના નેતા મનીષ સિસોદિયાએ શુક્રવારે પંજાબના સીએમ કેપ્ટન અમરિંદર સિંહ પર નિશાન સાધ્યું. તેમણે કહ્યું કે, 'તેઓ (કેપ્ટન અમરિંદર સિંહ) પંજાબના ખેડૂતોને રાષ્ટ્રીય સુરક્ષા માટે ખતરો જણાવી રહ્યા છે. પંજાબના મુખ્યમંત્રી આજે ભાજપના મુખ્યમંત્રીની જેમ વ્યવહાર કરી રહ્યા છે.' તેમણે કેન્દ્ર સરકાર અને કોંગ્રેસ પર ખેડૂતોનો અવાજ દબાવવા રાજકારણ કરી રહ્યા હોવાનો આરોપ પણ લગાવ્યો.

તો હરિયાણાના પૂર્વ સીએમ અને કોંગ્રેસના નેતા ભૂપે્ન્દ્ર સિંહ હુડ્ડાએ રાજ્યપાલ સમક્ષ વિધાનસભાનું વિશેષ સત્ર બોલાવવાની માંગ કરી. તેમણે કહ્યું કે, 'હરિયાણાના રાજ્યપાલને આગ્રહ છે કે, તે વિશેષ સભા સત્ર બોલાવે અને ખેડૂતોની સમસ્યા પર ચર્ચા કરે. સભામાં અમે અવિશ્વાસ પ્રસ્તાવ લાવીશું, કેમકે વર્તમાન સરકાર લોકોનો અને વિધાનસભાનો વિશ્વાસ ગુમાવી ચૂકી છે.'