દમણમાં બીચ પર ફરવા આવેલા પ્રવાસીના ગળા પર ચાકુ મૂકી યુવકોએ કરી લૂંટ

 

દમણ :- દમણમાં બીચ જેવા જાહેર સ્થળ પર અંકલેશ્વરથી ફરવા આવેલા પરિવારના સભ્યના ગળા પર 2 યુવકોએ ચાકુ મૂકી મહિલાનું મંગળસૂત્ર અને યુવકનો મોબાઈલ, પર્સ લૂંટી લેતા પોલીસ ફરિયાદ નોંધાઇ છે. આ ઘટનાનો વીડિઓ પણ વાયરલ થયો હોય પ્રવાસીઓમાં દહેશતનો માહોલ ઉભો થયો છે.

સંઘપ્રદેશ દમણનો દરિયા કિનારો પ્રવાસીઓ માટે સુરક્ષિત ના હોવાની ચકચારી ઘટના બની છે. ઘટનામાં અંકલેશ્વરથી ફરવા આવેલા યુગલના ગળા પર 2 યુવકોમાના એક યુવકે ચાકુ મૂકી મંગળસૂત્ર, પર્સ, મોબાઈલ મળી દોઢ લાખની લૂંટ કરી છે. નવાઈની વાત એ છે કે આ ઘટના પ્રવાસીઓથી ધમધમતા બીચ પર બની હતી. જ્યારે આસપાસ અનેક લોકો હોવા છતાં કોઈએ પણ લૂંટારાઓનો સામનો નહોતો કર્યો અને માત્ર વીડિયો ઉતારી વાયરલ કરવાની મનસા સંતોષી હતી.

આ અંગે ભોગ બનનાર મિતેષ પટેલે વિગતો આપી હતી કે તેઓ અંલેક્શ્વરથી દમણમાં ફરવા આવ્યાં હતા. જેમાં એક બીચ રિસોર્ટમાં રોકાયા બાદ વહેલી સવારે દરિયા કિનારે ફરવા ગયા હતાં. ત્યારે અચાનક ત્યાં ધસી આવેલા 2 યુવક પૈકીના એક યુવકે મિતેષ ના ગળા પર ધારદાર ચાકુ રાખી પત્નીના ગળામાં રહેલ મંગલસૂત્રની અને મોબાઈલ, પર્સ છીનવ્યા હતાં. જે બાદ બિન્દાસ્ત ત્યાંથી નાસી છૂટ્યો હતો.

ઘટનાની જાણ દમણ પોલીસ ને કરતા દમણ પોલીસે તપાસ હાથ ધરી છે. જો કે લૂંટ કરનાર યુવકની ભાષા પરથી તે બહારનો વ્યક્તિ હોવાનું ભોગ બનનારે જણાવ્યું હતું. ધોળા દિવસે પ્રવાસીઓ અને સ્થાનિકોથી ધમધમતા બીચ પર દોઢ લાખના સોનાની અને રોકડની લૂંટ થતા અન્ય પ્રવાસીઓમાં દહેશતનો માહોલ ઉભો થયો છે. અને દમણ પ્રવાસીઓ માટે સુરક્ષિત ના હોવાનો ભય સેવ્યો હતો.

ઉલ્લેખનીય છે કે ઘટના સમયે એક વ્યક્તિએ લૂંટ કરનાર યુવકનો વીડિઓ ઉતાર્યો છે. જે હાલ વાયરલ થયો છે. જેમાં યુવક અમદાવાદી ભાષામાં ગાળો બોલે છે. અને પાછળ આવ્યો તો ગોળી મારી દેવાની ધમકી આપે છે. સાથે જ સ્થાનિક મહિલાને ચાકુ બતાવી જેને લૂંટયો છે તેની સાથે તેની દુશ્મની હોવાનું જણાવી ત્યાંથી નાસતો જોવા મળી રહ્યો છે. જે જોતા સમગ્ર ઘટના કોઈ દુશ્મનાવટની હોવાનું પ્રથમ દ્રષ્ટિએ જોવા રહી રહ્યું છે

👆વિડિઓ👆