અમદાવાદઃ કોરોના અંધારયુગમાં આશાનું કિરણ, 5 દિવસમાં રિકવરી રેટ 53% વધ્યો

 ગુજરાતમાં બુધવારે સાંજે પાંચ વાગ્યા સુધીમાં પાછલા ચોવિસ કલાકના 14,120 નવા કોરોના કેસ નોંધાયા હતા આ સાથે રાજ્યમાં કુલ કોરોના કેસનો આંકડો 5.38 લાખ થઈ ગયો હતો. જોકે રાજ્યમાં ફેલાયેલા કોરોનાના આ અંધારયુગમાં આશાનું એક કિરણ જોવા મળ્યું છે. છેલ્લા 27 દિવસમાં પહેલીવાર કોરોનાના કેસમાં ઘટાડો નોંધાયો છે. ભલે તે ઘટાડો ખૂબ સામાન્ય 1.6 ટકા જેટલો હોય પરંતુ ઘટાડો થયો તે મહત્વની વાત છે. તો સામે પક્ષે આ જ 24 કલાકના સમય દરમિયાન 8595 લોકો સ્વસ્થ થઈને પરત ફર્યા છે. જે સાથે રાજ્યનો રિકવરી રેટ 61 ટકાએ પહોંચ્યો છે. જે પાંચ દિવસ પહેલા 23 એપ્રિલના રોજ 41 ટકા હતો. એબ્સોલ્યુટ ટર્મમાં વાત કરીએ તો દૈનિક ડિસ્ચાર્જ એટલે કે રિકવરી થવાનો આંકડો 5618 અંક વધ્યો છે જે 53 ટકા જેટલો વધારો છે.

તો બીજી તરફ વધુ એક રાહતના સમાચાર એ પણ છે કે અમદાવાદમાં દર્દીઓને હોસ્પિટલમાં દાખલ થવા માટે 108 એમ્બ્યુલન્સ માટે રાહ જોવી પડતી હતી તેમાં હાઈકોર્ટની ઝાટકણી પછી કોર્પોરેશને બુધવારે જાહેર કર્યું હતું કે કોઈપણ વાહનમાં પહોંચેલા દર્દીઓને હોસ્પિટલમાં સારવાર આપવામાં આવશે પરંતુ તે માટે દર્દી તરફથી કોઈએ હોસ્પિટલના ગેટ પર મળતા ફોર્મ ભરી તેની સાથે RTPCR રિપોર્ટની નકલ જોડવાની રહેશે જે બાદ હોસ્પિટલમાં જે પ્રેમાણે બેડ ખાલી થતા જશે તે મુજબ તંત્ર તરફથી દર્દીનો સંપર્ક સાધીને તેમને દાખલ કરવામાં આવશે.

કોરોનાની સારવાર માટે DRDOના સહયોગથી ગુજરાત સરકાર દ્વારા 900 બેડની ધન્વંતરી કોવિડ હોસ્પિટલ કાર્યરત કરવામાં આવી છે. હવે ત્યાં દાખલ થવા ઈચ્છતા કોરોના દર્દીઓએ કેટલીક પ્રક્રિયાનું પાલન કરવું પડશે. હાઈકોર્ટના આદેશ અનુસાર હવે 108 એમ્બ્યુલન્સ સિવાય આવતા દર્દીઓને અહીં એડમિટ કરાશે. સૌ પ્રથમ દર્દીના સગાએ ફોર્મ ભરી કોરોના પોઝિટિવ હોવાનો રિપોર્ટ અને અન્ય જરૂરી રિપોર્ટ્સ આપીને ટોકન લેવાનું રહેશે. તેના માટે ફોર્મ સવારે 8 થી 9માં હોસ્પિટલની બહારથી લેવાના રહેશે. ટોકન લીધા પછી હોસ્પિટલમાંથી ફોન પર મેસેજ મળે ત્યારે એડમિશન માટે દર્દીને હોસ્પિટલમાં લઈને આવાનું રહેશે. દર્દીને એડમિટ કરાવવા આવતી વખતે ટોકન ફરજિયાત લઈને આવવાનું રહેશે.