મહારાષ્ટ્રના ભંડારા જિલ્લાની સરકારી હોસ્પિટલમાં આગ લાગતા 10 નવજાત બાળકોના મોત

 

મહારાષ્ટ્રના નાગપુર નજીક ભંડારા જિલ્લાની સરકારી હોસ્પિટલમાં દુ:ખદ સમાચાર આવ્યા છે. આ હોસ્પિટલમાં શનિવારે મોડી રાત્રે આગને કારણે 10 નવજાતનાં મોત નીપજ્યાં છે. જિલ્લા હોસ્પિટલના સિક ન્યૂ બોર્ન કેર યુનિટ (SNSU)માં સવારે 2 વાગ્યે અચાનક આગ ભભૂકી ઉઠી હતી અને મોટો અકસ્માત સર્જાયો હતો.

આ દુર્ઘટનામાં, ઈન્ટેસિવ કેર યુનિટમાં રાખવામાં આવેલા 10 નવજાત બાળકોનું ઘટનાસ્થળે જ મોત નીપજ્યું હતું, જ્યારે 7 નવજાતને બચાવવામાં આવ્યા છે. એવું કહેવામાં આવી રહ્યું છે કે શોર્ટ સર્કિટને કારણે આગ લાગી છે.

જિલ્લા હોસ્પિટલના સિવિલ સર્જન ડો. પ્રમોદ ખંડાતેના જણાવ્યા મુજબ, હોસ્પિટલના ન્યૂ બોર્ન કેયર વોર્ડમાં 17 નવજાત બાળકો સારવાર લઈ રહ્યા હતા, આગ લાગતા 10 બાળકોના મોત થયા છે, જ્યારે 7 બાળકોને બચાવી લેવામાં આવ્યા છે.

ડો.ખંડાતેએ વધુમાં જણાવ્યું કે, 'આ અકસ્માત રાત્રે બે વાગ્યાની આસપાસ બન્યો છે. હોસ્પિટલના આઉટ બોર્ન યુનિટમાં ધુમાડો નીકળતો હતો. જ્યારે હોસ્પિટલની નર્સે દરવાજો ખોલ્યો ત્યારે આઉટ બોર્ન યુનિટમાં બધે ધુમાડો હતો. અધિકારીના જણાવ્યા પ્રમાણે નર્સ તરત જ હોસ્પિટલના અધિકારીઓને બોલાવ્યા હતા. ઇમરજન્સી વિભાગ અને ફાયર વિભાગ ઘટનાસ્થળે પહોંચી બાળકોને બચાવવા પ્રયાસ કર્યા હતા. જોકે, આ દુર્ઘટનામાં 10 શિશુઓના મોત નીપજ્યા હતા, જ્યારે 7 શિશુઓને બચાવી લેવામાં આવ્યા હતા.